Ռուսաստանում 2010 թվականից հաճախաակիացել են սեռական հանցագործությունները երեխաների նկատմամբ։ Այս մասին տեղեկացվել է անչափահասների գործերի եւ նրանց իրավունքների պաշտպանության կառավարական հանձնաժողովի նիստի արձանագրությունում՝ հղում կատարելով գլխավոր դատախազության տվյալներին, որոնք հրապարակվել են լուսավորության նախարարության կայքում, տեղեկացրել է ՏԱՍՍ-ը։
Փաստաթղթում նշվել է, որ 2010թ. գրանցվել է անչափահասների հանդեպ սեռական հանցագործությունների 9 524 դեպք, իսկ 2021թ.՝ 16 887 միջադեպ։
«Ընդ որում, այդ հանցագործությունների ավելի քան 50 տոկոսը կատարվում է երեխային ծանոթ անձի կողմից, յուրաքանչյուր հինգերորդը՝ ընտանիքի անդամի, 11 տոկոսը՝ ծնողների (օրինական ներկայացուցիչների), սեռական ոտնձգությունների 25 տոկոսը կատարվում է ալկոհոլ օգտագործած մարդկանց եւ հոգեկան հիվանդություններ ունեցող անձանց կողմից»,- նշվել է փաստաթղթում։
Արձանագրության համաձայն՝ երկրի 16 սուբյեկտները պետք է բարձրացնեն սեռական բռնության կանխարգելման աշխատանքի արդյունավետությունը։ Այս հանձնարարականները վերաբերում են Յուգրայի, Ալթայի եւ Զաբայկալիեի երկրամասերին, Ուդմուրտիային, ինչպես նաեւ Բրյանսկի, Արխանգելսկի, Աստրախանի, Բելգորոդի, Սախալինի, Ռոստովի, Սարատովի, Իրկուտսկի, Լենինգրադի, Մոսկվայի, Տյումենի եւ Յարոսլավլի մարզերին։
Ինչպես նշվել է արձանագրությունում, առաջիկայում նախատեսվում է ստեղծել սեռական բռնության կանխարգելման հարցերի գծով հատուկ աշխատանքային խումբ, որի կազմակերպչական-տեխնիկական գործառույթները կդրվեն լուսավորության նախարարության վրա։