Չինաստանում դատարանը կնոջը պարտավորեցրել է իր նախկին փեսացուին վերադարձնել 870 000 յուանը (126 000 դոլար), որը կինը ծախսել էր արտերկրում դստեր կրթության համար՝ նրանց հարսանիքի չեղարկումից հետո, հայտնում է SCMP-ը:

Շանհայից Լյու ազգանունով կնոջը դատի էր տվել նրա նախկին փեսացու Չժանը, որը սկզբում պահանջել էր վերադարձնել մոտ 1,6 միլիոն յուանը (232 000 դոլար), որն ինքը ծախսել էր Միացյալ Թագավորությունում Լյուի դստեր երկու տարվա կրթության համար։

Զույգը սկսել է հանդիպել 2015 թվականին, իսկ երկու տարի անց նրանք ստորագրել են նախաամուսնական գույքի պայմանագիր։ Այս համաձայնագրում ասվում էր, որ երբ Լյուն ամուսնանա Չժանի հետ, նա կվճարի ուսման վարձը եւ ընդհանուր 1 միլիոն յուանի ծախսերը՝ արտասահմանում դստեր երկու տարվա ուսման համար:

Սակայն 2018 թվականին Լյուն Չժանին հայտնել է, որ չի կարող ամուսնանալ նրա հետ։ Տղամարդը ցնցվել է ստորագրած պայմանագրի խախտումից եւ պահանջել է վերադարձնել իր գումարը։ Այդ պահին նա 1,6 մլն յուան էր վճարել։

Լյուն հրաժարվել է վերադարձնել գումարը, ուստի Չժանը հայց է ներկայացրել տեղի դատարան։