ՆԱՏՕ-ն եւ ԵՄ-ն կձգտեն ակտիվացնել համագործակցությունն այն բանից հետո, երբ «Ռուսաստանի ներխուժումն Ուկրաինա խախտել է եվրոպական անվտանգության կարգը», ասվում է համատեղ հայտարարության մեջ, որը մեջբերում է AFP-ն։
«Սա առանցքային պահ է եվրատլանտյան անվտանգության եւ կայունության համար՝ առավել քան երբեւէ ցույց տալով անդրատլանտյան կապերի կարեւորությունը եւ կոչ անելով ավելի սերտ համագործակցության ԵՄ-ի եւ ՆԱՏՕ-ի միջեւ»,- ասվում է երեքշաբթի օրը ՆԱՏՕ-ի եւ ԵՄ պաշտոնյաների կողմից ստորագրվելիք հայտարարության մեջ։
«Քանի որ մեր առջեւ ծառացած անվտանգության սպառնալիքներն ու մարտահրավերներն ավելի ու ավելի են մեծանում, մենք մեր գործընկերությունը կբարձրացնենք հաջորդ մակարդակին»:
Հռչակագրում՝ «աճող աշխարհառազմավարական մրցակցության» դեմ պայքարը, կարեւոր ենթակառուցվածքների պաշտպանությունն ու նոր տեխնոլոգիաների ու տարածության սպառնալիքների դեմ պայքարը նշվում են որպես ավելի խորը համագործակցության կարեւոր ոլորտներ:
Հայտարարության մեջ ասվում է, որ այդ մարմինները «միջազգային խաղաղության պահպանման գործում կատարում են փոխլրացնող եւ փոխադարձաբար ամրապնդող դեր» եւ պարտավորվել են «հետագայում մոբիլիզացնել» իրենց քաղաքական, տնտեսական եւ ռազմական հզորությունը:
Փաստաթուղթը կստորագրեն ՆԱՏՕ-ի գլխավոր քարտուղար Յենս Սթոլթենբերգը, Եվրոպական խորհրդի նախագահ Շառլ Միշելը եւ Եվրահանձնաժողովի նախագահ Ուրսուլա ֆոն դեր Լեյենը։
Համատեղ հռչակագիրը, որը առաջինն է 2018 թվականից ի վեր, հստակեցնում է, որ դաշինքը «մնում է հավաքական պաշտպանության ողնաշարը» իր անդամների եւ ավելի լայն եվրաատլանտյան տարածության համար։
