Չնայած Երեւանի կտրուկ հայտարարություններին առ այն, որ Հայաստանում արտատարածքային միջանցք չի լինի, Ադրբեջանում տարբեր պաշտոնյաներ շարունակում են հայտարարել այսպես կոչված «Զանգեզուրի միջանցքի» նախապատրաստման մասին։
Այս անգամ հայտարարություն է արել Նախիջեւանի Ինքնավար Հանրապետությունում Ադրբեջանի նախագահի լիազոր ներկայացուցիչ Ֆուադ Նաջաֆլին։ Այսօր Մեջլիսի նիստում նա պետական կառույցներին հանձնարարականներ է տվել «Զանգեզուրի միջանցքի» կապակցությամբ։ Այս մասին լրագրողներին հայտնել է Մեջլիսի պատգամավոր Էհթիմադ Մամեդովը, հաղորդում են ԶԼՄ-ները: «Նախչիվանում նախագահի լիազոր ներկայացուցիչ Ֆուադ Նաջաֆլին նաեւ հանձնարարել է ինքնավար հանրապետության բոլոր վարչություններին, հաստատություններին եւ կազմակերպություններին ուժեղացնել գործունեությունն այդ ուղղությամբ»,-նրա խոսքը մեջբերում են ԶԼՄ-ները:
