Ադրբեջանի նախագահ Իլհամ Ալիեւը «շատ տհաճ իրադարձություն է» համարում առանց Բաքվի համաձայնության Հայաստան ԵՄ նոր քաղաքացիական առաքելություն ուղարկելը։
«Դա չի բարձրացնի անվտանգությունը, այլ ընդհակառակը, կխաթարի բանակցությունների ձեւաչափը»,- ասել է նա։ Նրա խոսքով, «եթե Ադրբեջանի թիկունքում նման խաղեր լինեն, դա կասկածի տակ կդնի այս ձեւաչափի ապագան»: «Այժմ նոր առաքելության ներկայացուցիչները Հայաստանում են, այնտեղ հանդիպումներ են ունենում բարձրաստիճան պաշտոնյաների հետ։ Մեր ունեցած տեղեկություններով՝ փետրվարին նորից մեծ պատվիրակություն կուղարկվի այնտեղ, եւ կրկին առանց մեզ հետ համաձայնեցման»,- դժգոհել է Ալիեւը։
Նա նշել է, որ Բաքուն ԱՄՆ-ին եւ Ռուսաստանին դիտարկում է որպես Հայաստանի հետ բանակցությունների հարթակներ, փոխանցում է ՏԱՍՍ-ը։ «Ֆրանսիան իրականում լիովին մեկուսացրել է իրեն այս գործընթացից։ Հիմա մնում են Ամերիկան ու Ռուսաստանը։ Այսինքն, ներկայումս մենք տեսնում ենք նման բանակցությունների հարթակներ... Եվրոպան նույնպես կարող է նման հարթակ լինել, եթե իրեն ազնիվ պահի»։
