Բաքվում հայերի ջարդերի տարելիցի նախաշեմին Ադրբեջանը Հայաստանին նոր պահանջներ է ներկայացնում։

Պահանջներն այս անգամ շարադրված են վերջերս ի հայտ եկած «Արեւմտյան Ադրբեջանի համայնք» անվանմամբ կազմակերպության հայտարարության մեջ եւ հրապարակվել են ադրբեջանական ԶԼՄ-ների կողմից: 

Անտեղյակների համար՝ «Արեւմտյան Ադրբեջանը» ժամանակակից Հայաստանի ամբողջ տարածքն է, որին հավակնում է ադրբեջանական կողմը՝ արդեն չսահմանափակվելով Զանգեզուրով։ Ադրբեջանա-ղարաբաղյան հակամարտության ամենասկզբում Հայաստանում բնակվող էթնիկ ադրբեջանցիները վաճառել կամ փոխանակել են տներն ու բնակարանները, խլել գույքը եւ մեկնել պատմական հայրենիք։ Ադրբեջանում բնակվող հարյուր հազարավոր հայեր ենթարկվել են կոտորածի, վերապրածները լքել են երկիրը՝  առանց իրերի, տաք հագուստի։ Բաքվում եւ այլ քաղաքներում հայերի բնակարանները զավթել են ադրբեջանցիները։

Եվ ահա հիմա նրանք էլ պահանջներ են ներկայացնում Հայաստանին, ընդ որում՝ հայերի կոտորածի նախօրեին։

Բազմաթիվ էջերում շարադրված հայտարարության էությունը կայանում է նրանում, որ նրանք «Հայաստանի կառավարությունից պահանջում են պայմաններ ստեղծել միջազգային գործընթացի շրջանակում իրենց տներ վտարված ադրբեջանցիների անվտանգ եւ արժանապատիվ վերադարձի համար եւ ապահովել նրանց անհատական ու կոլեկտիվ իրավունքները այնտեղ վերադառնալուց հետո»։

Ադրբեջանական կողմը բողոքարկում է Մարդու իրավունքների համընդհանուր հռչակագրում, քաղաքացիական եւ քաղաքական իրավունքների միջազգային պակտում, փախստականների կարգավիճակի մասին կոնվենցիայում եւ այլ միջազգային ակտերում ամրագրված իրավունքը եւ ՄԱԿ-ի անդամ պետություններին եւ այլ համապատասխան կազմակերպություններին խնդրում «աջակցություն ցուցաբարել՝ Հայաստանի ներկայիս տարածքից արտաքսված ադրբեջանցիների անվտանգ եւ արժանավայել վերադարձի համար»։

Նկատենք, որ տեղահանված անձանց եւ փախստականների վերադարձի ցանկացած գործընթաց պետք է հայելային բնույթ կրի։ Այսպիսով, որպես ագրեսոր Ադրբեջանը պարտավոր է առաջինը կամ ապահովի հարյուր հազարավոր հայերի անվտանգ վերադարձը (չնայած քիչ հավանական է, որ այս ամբողջ վերապրածից հետո որեւէ մեկը ցանկանա մեկնել) կամ բարոյական եւ նյութական վնասի փոխհատուցում վճարի։