Չինաստանում աշխարհում առաջին անգամ ստեղծվել է արհեստական բանականությամբ կառավարվող նավ, որը կարող է ինքնուրույն արձակել օդային, վերջրյա եւ ստորջրյա դրոններ։ Ինչպես տեղեկացրել է South China Morning Post-ը, նավը հետազոտական է եւ կառավարվում է Գուանդուն նահանգի Ծովագիտության եւ ինժեներիայի Հարավային լաբորատորիայի  կողմից։

Zhuhaiyun նավը կարող է ինքնուրույն տեղաշարժվել բաց օվկիանոսում եւ կատարել առաջադրանքներ առանց մարդու միջամտության։ Սակայն անհրաժեշտության դեպքում օպերատորը կարող է կառավարումը վերցնել իր վրա։

Նավի տերերի տվյալներով՝ դրա հաջող թեստավորումը եւ դրոնների փորձնական արձակումը տեղի են ունեցել անցած շաբաթ, նավը 12 ժամվա ընթացքում ցույց է տվել, որ կարող է ինքնուրույն հաղթահարել խոչընդոտները եւ երթուղի գծել։

Նավը գործարկման մեջ կարող է օգտագործել արբանյակների տվյալները եւ սեփական ինքնուրույն սարքերը։

Ակնկալվում է, որ գործարկման մեջ մտնելուց հետո այն կօգտագործվի նկարահանումների, այդ թվում օվկիանոսի քարտեզագրման, ինչպես նաեւ պարեկման, ջրանմուշների ուսումնասիրման համար։

Նավի երկարությունը 88,5 մետր է, լայնությունը՝ 14 մետր, ջրատարողությունը՝ 2,1 հազար տոննա։ Շարժման միջին արագությունը կազմում է 13 հանգույց (24 կիլոմետր/ժամ), իսկ առավելագույնը՝ 18 հանգույց (33 կիլոմետր/ժամ)։