Կարելի է ասել, որ Արցախում կոնսենսուս կա առ այն, որ Արցախի հարցում Հայաստանի որդեգրած քաղաքականություն հակասում է Արցախի, արցախյան շարժման, արցախյան ազատագրական պայքարի հիմքում եղած մոտեցումներին: Այս մասին, այսօր՝ հունվարի 16-ին, ԱԺ-ում լրագրողների հետ զրույցում նշեց «Պատիվ ունեմ» խմբակցության պատգամավոր Տիգրան Աբրահամյանը:
«Արցախն այս փուլում ունի Արցախի հարցի հանգուցալուծման, առհասարակ գործընթացի շարունակելիության սեփական մոտեցումը, որն էականորեն տարբերվում է ՀՀ պաշտոնական դիրքորոշումից: Ակնհայտ է, որ կարեւորագույն հարցերի հետ կապված Արցախի եւ Հայաստանի իշխանություններն ունեն հակասություններ: Բնականաբար, սոցիալական, տնտեսական ուղղություններով որոշակի մակարդակի վրա հարաբերություններ ընթանում են»,-ասաց նա:
Աբրահամյանը նկատեց, որ առաջին լուրջ հակասությունը եղել է 2022-ի ապրիլին, երբ Նիկոլ Փաշինյանը հայտարարեց Արցախի հարցում նշաձողն իջեցնելու մասին. «Իշխանության տարբեր ներկայացուցիչներ բաց տեքստով խոսում էին այն մասին, որ Արցախը կարող է Ադրբեջանի կազմում ապագա ունենալ: Ասում էին, որ հայաստանը պաշտպանելու համար Արցախը պետք է թողնել բախտի քմահաճույքին: Դրան հետեւեց Արցախի ԱԺ 5 ուժերի համատեղ հայտարարությունը, որով անհամաձայնություն հայտնեցին ՀՀ արտաքին քաղաքական կուրսին: Հետո եղան նաեւ այլ հայտարարություններ:
Հայաստանը հայտարարում է, որ անելիք չի տեսնում քաղաքական եւ անվտանգային առումով Արցախում, ինչը կողմերի հակադրության կարեւոր դրույթներից մեկն է: Հայաստանը փորձում է սահմանափակվել բացառապես հումանիտար ու սոցիալական բնույթի հարցերով: Իսկ առանց Հայաստանի սատարման Արցախը չի կարող իր առջեւ դրված խնդիրները լուծել»,-ասաց Աբրահամյանը:
