Լատվիան, Լիտվան եւ Էստոնիան համատեղ կոչ են արել Գերմանիային՝ ուժեղացնել իր ղեկավարությունը եւ տանկեր ուղարկել Ուկրաինա՝ լրացուցիչ ճնշում գործադրելով Բեռլինի վրա, հայտնում է Reuters լրատվական գործակալությունը։
«Մենք՝ Էստոնիայի, Լատվիայի եւ Լիտվայի արտաքին գործերի նախարարներս, կոչ ենք անում Գերմանիային՝ Ուկրաինային Leopard տանկեր տրամադրել հիմա», - թվիթերում գրել է Էստոնիայի արտգործնախարարը․ «Դա անհրաժեշտ է ռուսական ագրեսիան դադարեցնելու, Ուկրաինային օգնելու եւ Եվրոպայում խաղաղությունը արագ վերականգնելու համար։ Գերմանիան՝ որպես եվրոպական առաջատար տերություն, այս հարցում հատուկ պատասխանատվություն է կրում»։
Հայտարարությունը հնչել է այն բանից հետո, երբ Գերմանիան եւ արեւմտյան դաշնակիցները չեն կարողացել որոշում կայացնել, արդյո՞ք Բեռլինը կհամաձայնի իր Leopard 2 տանկերը Ուկրաինա ուղարկել, թե՞ երկրներին, որոնք ունեն տանկեր, թույլ կտա անել դա: