Նյու Դելիում (Հնդկաստան) երեք դպրոցական հարձակվել է ֆիզիկական կուլտուրայի ուսուցչի վրա եւ դանակով հարվածներ հասցրել նրան, տեղեկացրել է The Times of India-ն։
29-ամյա ուսուցիչը նկատողություն էր արել աշակերտներից մեկին այն բանի համար, որ նա դպրոցական համազգեստ չի հագել, իսկ դրանից հետո զանգահարել էր նրա ծնողներին։
Պատանին վիրավորանքը «մեջն էր պահել» եւ որոշել վրեժ լուծել ուսուցչից։ Նա եւ իր համախոհները կարողացել են ուսուցչին համոզել, որ գա դպրոցի դատարկ հարկ, որտեղ էլ դանակով հարվածներ են հասցրել նրան։
Ուսուցիչը կարողացել է ազատվել նրանցից եւ փախչել։ Նա խոր վերքեր է ստացել։ Նրան տեղափոխել են հիվանդանոց։
Ուսուցչի վրա հարձակված դպրոցականներին կալանավորել են եւ տարել ոստիկանական տեղամաս։ Հարուցվել է քրեական գործ։