Իրանը, հավանաբար, կփոխի իր մոտեցումն ուկրաինական պատերազմին՝ ի պատասխան Կիեւի կառավարության կողմից Սպահանում խափանված անօդաչու թռչող սարքի հարձակման պատասխանատվությունը անուղղակի ընդունելու, հայտնում է Mehr-ը։
Իրանական Nour News թերթին տված հարցազրույցում անանուն աղբյուրը հայտնել է, որ «Ուկրաինայի նախագահ Վլադիմիր Զելենսկու խորհրդականի թշնամական հայտարարությունները կարող են տարբեր արձագանքների հանգեցնել» Թեհրանի կողմից։
«Իրանի ազգային անվտանգությանը սպառնացող Ուկրաինայի համառությունը կարող է ճանապարհ հարթել ուկրաինական պատերազմի հարցում Իրանի Իսլամական Հանրապետության դիրքորոշումը փոխելու եւ Կիեւի կառավարության վարքագծին համարժեք նոր մոտեցման քննարկման համար,- ասել է աղբյուրը,- Եթե Իրանի դեմ Ուկրաինայի նախագահի խորհրդական Միխայիլ Պոդոլյակի թշնամական հայտարարությունները չհերքվեն երկրի իշխանությունների կողմից, դրանք կարող են հանգեցնել Իրանի Իսլամական Հանրապետության այլ արձագանքի»։
Աղբյուրը նաեւ հայտնել է Nour News-ին, որ Իրանը հենց սկզբից սկզբունքային դիրքորոշում է որդեգրել Ուկրաինայի պատերազմի վերաբերյալ եւ բազմիցս ընդգծել է ռազմական հակամարտությունը դադարեցնելու եւ այն երկխոսության միջոցով լուծելու անհրաժեշտությունը:
«Թեեւ ուկրաինական կառավարությունը, որին սադրում են նրա արեւմտյան գործընկերները, կեղծ մեղադրանքներ է ներկայացնում Իրանին ուկրաինական պատերազմի ժամանակ Ռուսաստանին զինված աջակցություն ցուցաբերելու առումով, նա մինչ այժմ չի կարողացել որեւէ ապացույց ներկայացնել իր պնդումը հաստատելու համար»,- ասել է իրանական լրատվամիջոցի աղբյուրը:
Նա նաեւ նշել է, որ Իրանը բազմիցս կոչ է արել համատեղ հանդիպում կազմակերպել ուկրաինական կողմի հետ՝ Թեհրանի դեմ Կիեւի մեղադրանքների վերաբերյալ հնարավոր ապացույցները քննարկելու համար։
«Կատարում երկու երկրների քաղաքական եւ ռազմական փորձագետների վերջին համատեղ հանդիպմանը ուկրաինական կողմը չի ներկայացրել ոչ մի փաստաթուղթ, որը կհաստատի Իրանին ռուսական զենքով աջակցելու մասին պնդումը, եւ որոշվել է, որ փաստաթղթերը կներկայացվեն հաջորդ հանդիպումներին»,- հավելել է աղբյուրը։
Հունվարի 28-ի երեկոյան հզոր պայթյուն էր որոտացել Սպահանում։ Իրանի պաշտպանության նախարարությունը հայտարարել էր, որ դա անօդաչու թռչող սարքերի կողմից «ձախողված հարձակում է» եղել: Իրանական լրատվամիջոցները գրել են առնվազն հինգ նահանգներում պայթյունների մասին։ Al Arabiya հեռուստաալիքը հայտնել է Իրանի դեմ Իսրայելի ռազմական գործողության մասին։
Ավելի վաղ Պոդոլյակն իր Twitter-ում պարզաբանել էր, որ Սպահանում պաշտպանության նախարարության օբյեկտի վրա անօդաչու սարքի հարձակումը եւ Ազարշահրի գործարանում պայթյունը կարող են կապված լինել ուկրաինական իրադարձությունների եւ Իրանի կողմից Ռուսաստանի ենթադրյալ օգնության հետ՝ հավելելով, թե «Ուկրաինան ձեզ զգուշացրել է»։
Պոդոլյակի հայտարարության կապակցությամբ Իրանի ԱԳՆ-ն կանչել է Ուկրաինայի գործերի ժամանակավոր հավատարմատարին։
