Հայաստանն ականներ չի տեղադրել իր ինքնիշխան տարածքի սահմաններից դուրս։ Այս մասին հայտարարել է միջազգային իրավական հարցերով Հայաստանի ներկայացուցիչ Եղիշե Կիրակոսյանը՝ Հայաստանի դեմ Ադրբեջանի գործով բանավոր լսումների ժամանակ։
Նրա խոսքով, Ադրբեջանը նման հայտարարություններով «իր չարաշահումներից ուշադրությունը շեղելու հերթական փորձն է անում»։
Եղիշե Կիրակոսյանը հայտարարել է, որ Ադրբեջանը միշտ հայելային արտացոլման մարտավարություն է կիրառում՝ Հայաստանը միջնորդություն է ներկայացնում, դրան հետեւում է Ադրբեջանը։
«Այսօր, երբ Հայաստանը միջնորդություն է ներկայացրել հումանիտար ճգնաժամի հետ կապված միջանկյալ միջոցների կիրառման համար, որի պատճառը հայ բնակչությանը խեղդամահ անելու շարունակական փորձերն են, Ադրբեջանը փորձում է համարժեքության կեղծ տպավորություն ստեղծել»,- հավելել է նա՝ վստահեցնելով, որ Հայաստանն իր ինքնիշխան տարածքում ականներ է տեղադրել բացառապես պաշտպանական նպատակներով՝ հաշվի առնելով Ադրբեջանի կողմից կրկնվող ագրեսիայի գործողությունները։
Նրա խոսքով, ականները, որոնցից բողոքում է Ադրբեջանը, հավաքվել են Հայաստանի ինքնիշխան տարածքից, որը օկուպացվել է ադրբեջանական զինված ուժերի կողմից 2022 թվականին։
