«Եվրասիական ագրոէքսպրես»  նախագծի շրջանակում 2022 թվականի հունվարի 1-ից մինչեւ հոկտեմբերի 31-ը փոխադրվել է շուրջ 482 հազար տոննա արտադրանք, այդ թվում՝ ավելի քան 260 հազար տոննա սառնոցային բեռ։ Այս մասին փետրվարի 3-ին կայացած տեսակամուրջի ժամանակ հայտարարել է Եվրասիական տնտեսական հանձնաժողովի պաշտոնական ներկայացուցիչ Իյա Մալկինան։

Նա պարզաբանել է, որ առանցքային նշանակություն ունի բանջարեղենային պահածոների, հավի մսի, տավարի մսի, յուղաճարպային արտադրանքի փոխադրումը եւ այլն։ 

«Արդեն ձեւավորվել է սառնոցային կոնտեյներների սեփական պարկը՝ 500 միավոր քանակով։ Մենք նախատեսում ենք, որ 2023 թվականին այս պարկը կավելանա մինչեւ 1000 միավոր, եւ լրացուցիչ վարձակալության պայմաններով մշակվում է գործընկեր ընկերություններից մինչեւ 700 միավոր սառնոցային կոնտեյներներ ներգրավելու հարցը։ Դա թույլ կտա ավելացնել փոխադրվող բեռների քանակը»,-հավելել է Մալկինան։

Ինչ վերաբերում է արդյունաբերական ոլորտին, ապա նա հայտնել է, որ միությունում արդեն իրականացվել է ներմուծման փոխարինման 25 նախագիծ՝ ավելի քան 21 մլրդ դոլար ընդհանուր գումարով։ Դրանք են ավտոմոբիլային, հաստոցաշինական, էլեկտրական, քիմիական, մետալուրգիական, բժշկական արդյունաբերությունը եւ այլ ոլորտներ։