Տասնյակ հազարավոր իսրայելցիներ շաբաթ օրը երկրի մի շարք քաղաքներում դուրս են եկել փողոց՝ բողոքելու վարչապետ Բենիամին Նեթանյահուի կառավարության՝ դատական համակարգը բարեփոխելու ծրագրերի դեմ, հայտնում է Associated Press-ը։
Քննադատներն ասում են, որ կոշտ դիրքորոշում ունեցող նոր կառավարության կողմից ձեռնարկված միջոցները կթուլացնեն Գերագույն դատարանը, կսահմանափակեն դատական վերահսկողությունը եւ ավելի մեծ լիազորություններ կտան քաղաքական գործիչներին: Ցուցարարները կարծում են, որ այդ ծրագրերի իրականացումը կխաթարի երկրում ժողովրդավարության գոյությունը։
Դատարանների լիազորությունների շուրջ տարաձայնությունները խորանում են, քանի որ կառավարությունը մտադիր է երկուշաբթի օրը որոշ օրենսդրական նախագծեր ներկայացնել խորհրդարան՝ գործարար եւ մասնագիտական խմբերի մասնակի գործադուլների կոչերի ֆոնին:
Արդեն վեցերորդ շաբաթն է, որ ցուցարարները շարունակում են խոշոր ակցիաներ իրականացնել, որոնցից հիմնականը տեղի է ունեցել Թել Ավիվի կենտրոնում, ինչպես նաեւ մի քանի փոքր հավաքներ այլ քաղաքներում։