Արեւմտյան երկրորդ օկրուգային ռազմական դատարանը քրեական հեղինակություն Օլեգ Մեդվեդեւի գործը, որը հայտնի է Շիշկան անունով (նախկինում Շիշկանով ազգանունն էր կրում) կքննի մամուլի եւ հանրության համար փակ ռեժիմով, հաղորդում է ՏԱՍՍ-ը։
Գործը դռնփակ դատական նիստում քննելու մասին միջնորդել էր մեղադրող կողմը։ Ընդ որում, գործի քննությանը կմասնակցեն երդվյալ ատենակալները։ Օլեգ Մեդվեդեւը չի համաձայնել դատարանի որոշման հետ եւ հայտարարել է այն բողոքարկելու մտադրության մասին: Օլեգ Մեդվեդեւը եւ գործի եւս 18 ֆիգուրանտներ մեղադրվում են ծանր եւ առանձնապես ծանր հանցագործությունների կատարման մեջ, որոնց թվում են սպանություններ, շորթումներ, ինչպես նաեւ հրազենի ապօրինի պահպանում:
Ամենադաժան հանցագործություններից մեկը, որը մեղսագրում են Օլեգ Մեդվեդեւին, «Պլեմզավոդ Ռամենսկոյե» ՓԲԸ գլխավոր տնօրեն, տեղական ինքնակառավարման մարմնի պատգամավոր Տատյանա Սիդորովայի եւ նրա ընտանիքի երեք անդամների սպանությունն էր: Դատարանը որոշել է, որ հաշվի առնելով քրեական հեղինակության կապերը իրավապահ մարմիններում, տարածաշրջանում անկողմնակալ դատավճիռ կայացնել չի ստացվի։ Ամբաստանյալի փաստաբան Ելենա Սենինան կարծում է, որ քրեական գործը «չեն համարձակվել հանձնել Մոսկվայի շրջանային դատարան՝ վախենալով արդարացումից», հաղորդում է «Коммерсантъ»-ը։