Արցախն ու նրա ինքնորոշման իրավունքն անսակարկելի են։ Այս մասին այսօր՝ փետրվարի 24-ին, «Արցախի Հանրապետության միջազգային ճանաչման հրամայականը» խորագրով գիտագործնական համաժողովում նշեց Հայ առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանը։
Նշենք, որ համաժողովի մեկնարկը տրվեց Իմաստության աղոթքով, որից հետո Բագրատ Սրբազանը ներկաներին փոխանցեց կաթողիկոսի ջերմ գնահատանքը նախաձեռնության առիթով։
«Արցախի ժողովրդի ինքնորոշման իրավունքն անսակարկելի է, և սա այն բացարձակ սահմանագիծն է, որից այն կողմ չենք կարող անցնել։ Ուզում եմ բոլորիս շնորհավորել այն խիզախումի համար, որ 35 տարի առաջ այս օրերին ապրում էր մեր ժողովուրդը` միտված լինելով Արցախի և մեր կյանքի ազատագրությանը` լայն իմաստով»,– ասաց Տավուշի թեմի առաջնորդը։
Նա ընդգծեց` մենք կոչված չենք վերջնականապես պարտվելու, այլ կոչված ենք այդ պարտությունից վեր կանգնելու, սովորելու և կերտելու մեր նոր հաղթանակները։
