ԱՄՆ-ի եւ Իրանի միջեւ որեւէ պաշտոնական եւ բաց բանակցություն չի եղել, սակայն երկու կողմերն էլ հաղորդագրություններ են ուղարկում երրորդ երկրների միջոցով, եւ ԱՄՆ պաշտոնյան հաստատել է, որ շփումները շարունակվում են։ Այս մասին երկուշաբթի օրը կայացած մամուլի ասուլիսում հայտարարել է Իրանի ԱԳՆ պաշտոնական ներկայացուցիչ Նասեր Քանանին, տեղեկացնում է ԻՌՆԱ-ն։
Նրա խոսքով, Իրանում բացառում են իրանական միջուկային ծրագրի վերաբերյալ Գործողությունների համատեղ համապարփակ ծրագրի (ԳՀՀԾ) վերսկսման շուրջ բանակցություններում որեւէ ժամանակավոր համաձայնագրի կնքման հնարավորությունը։
«Մենք դիտարկում ենք միայն ԳՀՀԾ-ին բոլոր կողմերի վերադարձնելու տարբերակը»,- ասել է երկրի արտաքին գործերի նախարարության ներկայացուցիչ Նասեր Քանանին։ Նա նշել է, որ Իրանը ոչ մի դեպքում չի համաձայնի ժամանակավոր համաձայնագրի կնքմանը։
Քանանին նշել է, որ այս նպատակին հասնելու համար Իրանի դեմ պատժամիջոցները պետք է հանվեն։
