Թուրքիայի «Աքքույու» ատոմակայանը, որը կառուցում է Ռուսաստանը, կդառնա նախագահ Ռեջեփ Թայիփ Էրդողանի իշխող «Արդարություն եւ զարգացում» կուսակցության (ԱԶԿ) նախընտրական արշավի այցեքարտերից մեկը։ Այդ մասին գրում է Hurriyet թերթը։
Ապրիլի 11-ին Թուրքիայում սկսվում է ուղիղ քարոզարշավի շրջան՝ մայիսի 14-ին կայանալիք նախագահական եւ խորհրդարանական ընտրություններից առաջ։ Կուսակցություններն ու պետության ղեկավարի թեկնածուները հանրահավաքներ կանցկացնեն ու ելույթներ կունենան, ամբողջ երկրով մեկ կփակցվեն քաղաքական գործիչների հաջողությունները հիշատակող պաստառներ։
«Արդարություն եւ զարգացում» կուսակցությունը նաեւ մտադիր է հիշեցնել «Աքքույու» ատոմակայանի մասին, որը կառուցվում է Թուրքիայի հարավում՝ Մերսինում։ Էրդողանն ինքը իր ելույթներում հաճախ է անդրադառնում կայանի թեմային՝ նշելով դրա ռազմավարական նշանակությունը հանրապետության համար։
Ընթացիկ քարոզարշավում «Աքքույու» ԱԷԿ-ը կներկայացվի որպես ներկայիս իշխանությունների մեգանախագծերից մեկը, որը հպարտություն է առաջացնում։ Բացի կայանից, նման նախագծերի ցանկը ներառում է թուրքական առաջին Togg էլեկտրամոբիլը, հայրենական կործանիչը, թեթեւ ավիակիր հանդիսացող TCG Anadolu դեսանտային նավը եւ այլն։