Ալիեւը շարունակում է Ֆրանսիայի հանդեպ գռեհիկ վերաբերմունքը եւ ԵԱՀԿ ՄԽ-ն «նախկին» անվանում։
«Միջազգային միջնորդները՝ ԵԱՀԿ նախկին Մինսկի խումբը, բանակցելով, փաստացի փորձում էին ամրագրել այդ օկուպացիան։ Հիմա ամեն ինչ պարզ է դարձել. պատահական չէ Ֆրանսիայի այդ անարդար եւ բացասական վերաբերմունքը։ Պարզապես օկուպացիայի ժամանակ ինչ-որ չափով ուզում էին դա կոծկել, պարզ ասած՝ ուզում էին մեզ շփոթեցնել։ Բայց տեսեք, թե ղարաբաղյան երկրորդ պատերազմից հետո երկուսուկես տարի անց ինչ կեղտոտ գործողություններ են կատարվում մեր դեմ, ինչ անհիմն մեղադրանքներ են առաջադրվում։ Այսինքն՝ այս ամենն ակնհայտ է, այդ թվում՝ Եվրախորհրդարանի կողմից Ադրբեջանի դեմ ընդունված մի շարք բանաձեւեր, որոնք կրկին հայամետ, կաշառակեր եւ հակաադրբեջանական խմբավորման արգասիքն են, եւ այստեղ առաջատար դեր են խաղում ֆրանսիացի պատգամավորները։ Բնականաբար, մենք դա զգացել ենք նաեւ օկուպացիայի ժամանակ, բայց ոչ այդ աստիճան։ Մենք չէինք էլ կարող պատկերացնել, որ երկրները կարող են այդ աստիճանի կեղծավոր եւ ստախոս լինել։ Նրանք կարող են մարդու երեսին նայելով մի բան ասել, իսկ նրա թիկունքում մեկ այլ բան անել»,-բողոքել է Ալիեւը՝ ընդունելով Լաչինի շրջանում իր ներկայացուցիչ Մասիմ Մամեդովին։
