Իրականացվող ուսումնասիրությունները շատ կարեւոր էին նոր իրավիճակը հասկանալու եւ նախապատրաստվելու տեսանկյունից, պետությունը պետք է հասկանա, թե ինչպես կարելի է փոխել կառավարման մոդելը։ Այս մասին մարտի 29-ին «Շրջափակման պատճառով Արցախի տնտեսության կորուստների գնահատման մասին» հաշվետվության քննարկման ժամանակ հայտարարել է «Մենք ենք, մեր սարերը» տարածքային զարգացման գործակալության համահիմնադիր, Արցախի նախկին պետնախարար Ռուբեն Վարդանյանը։ Նա հայտնել է, որ շրջափակման առաջին օրվանից փորձ է արվել ոչ միայն օպերատիվ կերպով արձագանքել խնդիրներին, այլեւ հարցերին մոտենալ երկարաժամկետ հեռանկարի տեսանկյունից: Նրա խոսքով՝ դրա համար պետք էր հետեւողական աշխատանք տանել, ինչը շատ կարեւոր էր ոչ միայն Արցախի, այլեւ ողջ աշխարհի համար:
«Կարեւոր էր պատկերացնել, որ խնդիրը ոչ միայն պարենի կամ էներգակիրների պակասն է, այլեւ հասարակության եւ պետության ապագայի հետ կապված խորքային ճգնաժամը։ Եթե մենք խոսում ենք ճգնաժամի եւ խնդիրների մասին, որոնք ազդում են բոլորի վրա, ապա կարեւոր է աշխատանքին մոտենալ պրոֆեսիոնալ կերպով»,-նշել է Վարդանյանը։
Նախկին պետնախարարը հավելել է, որ Արցախում եւ Հայաստանում բովանդակային քննարկումների պակաս կա: «Առանց թափանցիկության, առանց ճիշտ վերլուծության եւ ախտորոշման չենք կարող դիմակայել ներկա եւ ապագա մարտահրավերներին»,-նշել է նա։