«ՄՏՍ Հայաստան» ընկերության գնորդի անունը չեմ կարող ասել, քանի որ դա կոմերցիոն գաղտնիք է։ Այս մասին մարտի 30-ին լրագրողների հետ զրույցում ասել է Հայաստանի հանրային ծառայությունները կարգավորող հանձնաժողովի նախագահ Գարեգին Բաղրամյանը։
Նա պարզաբանել է, որ գնորդը կապի գործող օպերատոր չէ, հակառակ դեպքում կարող է շուկայի կենտրոնացման հարց առաջանալ։ Նրա խոսքով, եթե չի սխալվում, քննարկումները պետք է ավարտվեն մինչեւ ապրիլի 10-ը։
Բաղրամյանը հիշեցրել է, որ «ՄՏՍ Հայաստան» ընկերությունը վաճառքի հարցով դիմել է ՀԾԿՀ։ «Դիմումը ներկայացվել է նաեւ Բարձր տեխնոլոգիական արդյունաբերության նախարարություն, որը պետք է քննարկումներ անցկացնի Ազգային անվտանգության ծառայության հետ՝ պարզելու, թե արդյոք գործարքը չի հակասում ազգային անվտանգության հարցերին», - ասել է պաշտոնյան։
