Ամերիկյան The Wall Street Journal (WSJ) թերթի՝ լրտեսության մեջ կասկածվող լրագրող Էվան Գերշկովիչի կալանավորումն անօրինական է, ապրիլի 11-ին լրագրողներին ասել է ԱՄՆ նախագահ Ջո Բայդենը՝ Էնդրյուս բազայից Հյուսիսային Իռլանդիա թռիչքից առաջ։
«Մենք պարզ հասկացնում ենք, որ այն, ինչ տեղի է ունենում, ամբողջովին անօրինական է», - ասել է պետության ղեկավարը։ Բայդենը նաև նշել է, որ փորձել է զանգահարել Գերշկովիչների ընտանիքին, սակայն մինչ այժմ դա անել չի հաջողվել։
Գերշկովիչը ձերբակալվել է մարտի 30-ին Եկատերինբուրգում, երբ փորձում էր պետական գաղտնիք ներառող գաղտնի տեղեկատվություն ստանալ ռուսական ռազմարդյունաբերական համալիրի ձեռնարկություններից մեկի մասին։
Լրագրողի դեմ քրեական գործ է հարուցվել Ռուսաստանի Դաշնության Քրեական օրենսգրքի 276-րդ («լրտեսություն») հոդվածով: Մոսկվայի Լեֆորտովոյի դատարանը Գերշկովիչին երկու ամսով կալանավորել է։ Գերշկովիչը կտրականապես հերքել է բոլոր մեղադրանքները՝ հայտարարելով, որ Ռուսաստանում լրագրողական գործունեությամբ է զբաղվել։