Էկվադորի Գուայաքիլ նավահանգստային քաղաքում զինված հարձակման հետեւանքով 10 մարդ է զոհվել, հայտնում է Reuters-ը՝ վկայակոչելով ոստիկանությանն ու դատախազությանը։
Դեպքի վայրում հայտնաբերվել է հրացան և 9 մմ տրամաչափի ատրճանակներ, հայտնել է Էկվադորի դատախազությունը Twitter-ի իր միկրոբլոգում։
«Այս պահին մեր քննչական և հետախուզական ստորաբաժանումները օպերատիվ գործողություններ են իրականացնում՝ հանցագործներին բացահայտելու համար», - գրել է Ազգային ոստիկանությունը Twitter-ում։
Էկվադորի կառավարությունը ապրիլի սկզբին արտակարգ դրություն է հայտարարել Գուայաքիլում և հարակից շրջաններում՝ փորձելով զսպել խաղաղօվկիանոսյան նավահանգստային քաղաքում բռնությունների աճը: Այս միջոցը ներառում է պարետային ժամ ժամը 01:00-ից մինչև 05:00-ն ընկած ժամանակահատվածում:
Հարավամերիկյան երկիրը վերջերս թույլ է տվել խաղաղ բնակիչներին զենք կրել և օգտագործել անձնական պաշտպանության համար՝ հանցագործության աճի ֆոնին, որի համար կառավարությունը մեղադրում է թմրանյութերի խմբավորումներին:
