Հայոց ցեղասպանության թանգարան-ինստիտուտի նորոգումը կկատարվի մաս-մաս, այն չի խոչընդոտի այցելուների մուտքին։ Այս մասին NEWS.am-ի հետ զրույցում ասաց թանգարան-ինստիտուտի տնօրեն Հարություն Մարությանը։

Նրա խոսքով՝ թանգարանի եւ վարչական շենքի նորոգման աշխատանքները նախատեսվում են հուլիսից մինչեւ մյուս տարվա հուլիս, իսկ հուշարձանինը եւ այլ հատվածներինը՝ մյուս տարվա հուլիսից կրկին մեկ տարով։

«Թանգարանի շենքում խնդիր ունենք ջրամեկուսացման եւ ջրահեռացման, այսինքն՝ առաստաղից մեր սենյակներում ջուր է կաթում։ Երկու տարով փակ է լինելու թանգարանի ամենաներքեւի ցուցասրահը, քանի որ առաստաղը վատ վիճակում է։ Հուշարձանի փակվելու մասին եւս խոսք չկա։ Թանգարանն ամբողջությամբ չի փակվելու, կեղծ լուրեր են, նորոգումն այցելուներին չի խանգարելու։ Այն լինելու է մաս-մաս։ Եթե մի մուտքում վերանորոգման հետեւանքով խնդիր լինի, մյուս մուտքով կմտնեն այցելուները»,- ասաց Մարությանը։