Հայաստանի հետ սահմանին վերջին սրմամբ Ադրբեջանը ճնշում է գործադրում։ Այս մասին NEWS.am-ի հետ զրույցում ասաց ռուս ռազմական փորձագետ Պավել Ֆելգենգաուերը։ Նա դա որակեց որպես սահմանային հերթական բախում, որը ժամանակ առ ժամանակ տեղի է ունենում եւ Երեւանի վրա ճնշման միջոց է: Նրա գնահատմամբ՝ Ադրբեջանին ամենից շատ հետաքրքրում է դեպի Նախիջեւան այսպես կոչված միջանցքի բացումը։ Փորձագետը պարզաբանեց, որ Ադրբեջանը փորձում է հասնել նրան, որ հեշտացվի մուտքը Նախիջեւան եւ այն միացնի Ադրբեջանի հիմնական մասի հետ:

«Ինչ-որ առումով դա հետաքրքիր է նաեւ Թուրքիային, բայց առաջին հերթին դա ուզում է Բաքուն։ Բացի այդ, Բաքուն փորձում է Հայաստանին ցույց տալ, որ նա միայնակ է։ Եվ Ադրբեջանը դա արդեն ապացուցել է՝ ցույց տալով, որ անում է գրեթե այն ամենն, ինչ ուզում է։ Առնվազն նման տպավորություն է ստեղծում, քանի որ այսօրվա դրությամբ բոլոր հաղթաթղթերը հենց Բաքվի ձեռքում են, որն առաջնորդվում է «կարող ես՝ արա» սկզբունքով»,-նշեց Ֆելգենգաուերը։ Նա կարծում է, որ Ռուսաստանի համար ամենակարեւորն այն է, որ Հարավային Կովկասում հիմա ոչինչ չպայթի, քանի որ Մոսկվան հիմա ժամանակ չունի այդ տարածաշրջանի համար։ «Ռուսաստանի համար կարեւոր է, որ այնտեղ հանգիստ լինի, եւ Հարավային Կովկասի բոլոր երեք հանրապետություններում տիրի Մոսկվայի նկատմամբ համեմատաբար բարեկամական վերաբերմունքը»,-հավելեց ռազմական փորձագետը:    

Ավելի վաղ NEWS.am-ը հայտնել էր, որ Ադրբեջանի ԶՈՒ ստորաբաժանումները ժամը 06.00-ից հրետանային եւ ականանետային միջոցներից կրակ են բացել Սոթքի ուղղությամբ տեղակայված հայկական դիրքերի ուղղությամբ: Ադրբեջանական սադրանքի հետեւանքով հայկական կողմն ունի 4 վիրավոր: Ժամը 11:00-13:00-ն ընկած ժամանակահատվածում Ադրբեջանի ԶՈՒ ստորաբաժանումները Սոթքի հատվածում որոշակի պարբերականությամբ խախտել են հրադադարի ռեժիմը:  

Արամ Դանիելյան