Ադրբեջանը բանակցություններից առաջ կամ հետո միշտ դիմում է սադրանքների, եւ դա ավանդույթ է դարձել։ Այս մասին այսօր՝ մայիսի 12-ին, լրագրողների հետ ճեպազրույցում ասաց ՀՀ ԱԳ փոխնախարար Պարույր Հովհաննիսյանը:
Հիշեցնենք, որ ադրբեջանական կողմը երեկվանից տարբեր տրամաչափի զինատեսակներով պարբերաբար կրակ է բացում Գեղարքունիքի մարզի մարտական դիրքերի ուղղությամբ: Հայկական կողմն ունի 6 վիրավոր:
«Ցավոք, նոր գործելաոճ չէ: 1995 թվականից եմ Արտգործնախարարության համակարգում եւ չեմ հիշում մեկ բանակցությունների փուլ, որ չլինեն նման սադրանքներ կամ մինչեւ հանդիպումը կամ հանդիպումից հետո. ցավոք, այսպիսի ավանդույթ է ձեւավորվել: Գնահատականը տրվել է թե՛ ԱԳՆ-ով, թե՛ վարչապետի կողմից՝ Կառավարության նիստի բացման ժամանակ»,- ասաց ԱԳ փոխնախարարը:
Հարցին՝ Վաշինգտոնում Հայաստանի եւ Ադրբեջանի միջեւ ի՞նչ պայմանավորվածություններ են ձեռք բերվել, ի՞նչ առաջընթացի մասին է խոսքը, փոխնախարարն ասաց. «Առաջընթացը վերաբերում էր ավելի լավ պատկերացումներ ստանալ երկու կողմերի մոտեցումների վերաբերյալ, դա արվեց: Ամերիկյան կողմը հնարավորինս արեց, որպեսզի ստեղծվեր դրական մթնոլորտ: Իսկապես արդյունավետ փուլ էր հնարավոր պայմանագրի նախագծի շուրջ մոտեցնել այդ դիրքորոշումները: Իհարկե կան մի շարք կարեւորագույն հարցեր, որ դեռ պետք է քննարկվեն, հենց դրա համար է, որ Բրյուսելում կազմակերպվում է բարձրագույն մակարդակով հանդիպումը, որին կհաջորդի արտգործնախարարների մակարդակով Մոսկվայում հանդիպումը եւ կլինեն այլ հանդիպումներ նույնպես»:
Պարույր Հովհաննիսյանի խոսքով` մոսկովյան հանդիպումն ինչ-որ չափով կլինի Վաշինգտոնում բանակցությունների տրամաբանական շարունակությունը, բայց միեւնույն ժամանակ յուրաքանչյուր ֆորմատ ունի իր յուրահատկությունը։
Նշենք, որ հունիսի 1-ին Քիշնեւում սպասվում է բարձր մակարդակի եւս մեկ հանդիպում, թեեւ Բաքուն դեռ չի հաստատել իր մասնակցությունը։ Դա կլինի Պրահայի ձեւաչափի կրկնությունը՝ Հայաստանի, Ադրբեջանի ղեկավարների, Եվրոպական խորհրդի ղեկավարի, Ֆրանսիայի նախագահի մասնակցությամբ։
Փոխնախարարի խոսքով` սպասվում է նաեւ Գերմանիայի կանցլեր Օլաֆ Շոլցի մասնակցությունը. «Գերմանիայի եւ Ֆրանսիայի մասնակցությունը դրական ներդրում կլինի, քանի որ խոսքը ԵՄ երկու ազդեցիկ երկրների մասին է»: