Ռուս խաղաղապահները պետք է կատարեն իրենց գործառույթները եւ ապահովեն Լաչինի միջանցքով անխափան տեղաշարժը։ Այս մասին մայիսի 17-ին լրագրողների հետ զրույցում ասաց «Հայաստան» դաշինքի պատգամավոր Ագնեսա Խամոյանը։
Նա նշեց, որ ռուս խաղաղապահները նույնպես պատասխանատվություն են կրում Լաչինի միջանցքում տիրող իրավիճակի համար՝ հավելելով, որ միջանցքը պետք է բացվի։
Խամոյանն անընդունելի անվանեց, որ Հայաստանի իշխանություններն ամբողջությամբ հրաժարվում են պատասխանատվությունից։ Նրա խոսքով՝ իրենք էլ են պատասխանատու. «Ակնհայտ է, որ Հայաստանում հակառուսական տրամադրություններ են նկատվում։ Եթե ներկայիս իշխանությունները վերջնականապես փոխեն արտաքին քաղաքական վեկտորը, ապա դրա շարունակությունը կլինի ռուսական ռազմաբազայի դուրսբերումը Հայաստանից։
Սա տեղավորվում է Հայաստանի իշխանությունների տրամաբանության մեջ, երբ Թուրքիայի հետ բարիդրացիական հարաբերություններ են կառուցվում։ Ակնհայտ է, որ այս գործընթացի ավարտը, իրենց ընկալմամբ, պետք է լինի հենց ռուսական բազայի դուրս բերումը Հայաստանից»,- նշեց պատգամավորը։
Նրա խոսքով՝ իշխանությունները իրենց աթոռները փրկելու համար պատրաստ են ամեն ինչի։ «Նիկոլ Փաշինյանը (ՀՀ վարչապետ - խմբ.) մոլորվել է Մոսկվա-Բրյուսել-Վաշինգտոն տարանցման մեջ, փորձում է բավարարել բոլոր կողմերին եւ ոչ մեկին չնեղացնել։ Այս բոլոր հարթակներում Ադրբեջանին հաջողվում է հասնել իր նպատակին, սակայն հայանպաստ լուծման հասնել չի հաջողվում»,- եզրափակեց պատգամավորը։
