Շատ կարեւոր է ասել, որ մենք բոլորս պատրաստ ենք գնալ մինչեւ վերջ, որովհետեւ այլ ճանապարհ չկա։ Կարեւոր է հայտարարել, որ մենք պատրաստ ենք վերցնել պատասխանատվությունը եւ միավորվել գաղափարի շուրջ, եւ պատրաստ ենք հանուն գաղափարի ներդնել մեր հնարավորությունները։ Այս մասին մայիսի 18-ին մամուլի ասուլիսում ասել է «Արցախի անվտանգության եւ զարգացման ճակատ»-ի համակարգող, Արցախի նախկին պետնախարար Ռուբեն Վարդանյանը։

«Արցախի ապագան մեր ձեռքերում է, այլ ոչ թե ինչ-որ մեկի, հենց մենք ենք որոշում մեր ապագան։ Այս գաղափարի շուրջ միավորվել են տարբեր մարդիկ տարբեր ճամբարներից։ Սա շատ կարեւոր օրինակ է, որ մարդիկ կարող են միավորվել գաղափարի շուրջ, այլ ոչ թե մարդու։ Մարդիկ միավորվել են եւ գիտակցել սուր իրավիճակը, որի առջեւ մենք հայտնվել ենք։

Մենք պատասխանատու ենք մեր ապագայի համար։ Մենք կարողացանք, միմյանց աչքերին նայելով, խոսել անցյալի եւ գաղափարի մասին։ Առաց գաղափարի գործողությունները վտանգավոր են։ Մենք կարողացանք մի կողմ դնել անձնական եւ կուսակցական շահերը եւ փորձել լսել մեկս մյուսին։ Մենք ամեն ինչ կանենք, որպեսզի Արցախը լինի անվտանգ, երջանիկ, հայկական, ազատ»,- նշել է նա։

Վարդանյանը վստահություն է հայտնել, որ այս շարժմանը կմիանան հազարավոր մարդիկ ե՛ւ Հայաստանում, ե՛ւ Արցախում, ե՛ւ ամբողջ աշխարհում։

«Արցախի ապագան, նրա անկախ եւ հայկական լինելու խնդիրը ողջ հայության խնդիրն է»,- ընդգծել է նա։