Ադրբեջանի արտաքին գործերի նախարարությունը բառացիորեն սակարկություն է սկսել գերիների հարցով՝ չփորձելով անգամ թաքցնել սեփական հայտարարությունների սպեկուլյատիվ բնույթը։
«Ինչ վերաբերում է Ադրբեջանի տարածքում հայ ռազմագերիների մասին հարցին, նշենք, որ Ադրբեջանը շատ դեպքերում անհատույց Հայաստանին է վերադարձրել պատերազմի ժամանակ գերեվարված զինվորներին»։ ԱՊԱ-ն նշում է, որ այս մասին ասված է Հայաստանի արտգործնախարար Արարատ Միրզոյանին ուղղված Ադրբեջանի ԱԳՆ-ի պատասխանում։
«Ինչ վերաբերում է Հայաստանի կողմից պատերազմից հետո մեր երկրի տարածք ռազմական սադրանքներ անելու համար ուղարկված հայ զինծառայողների խմբին, ապա Հայաստանի ղեկավարությունը գիտի, որ նրանք ռազմագերի չեն։ Չնայած նրան, որ Ադրբեջանը, բարի կամք դրսեւորելով, Հայաստանին է վերադարձրել այս խմբի գրեթե կեսին, հայկական կողմը, կազմակերպելով կեղծ դատավարություն, հրաժարվում է վերադարձնել մոլորված եւ Հայաստանի տարածք անցած ադրբեջանցի երկու զինծառայողներին՝ դրանով իսկ խաթարելով վստահության ամրապնդման ջանքերը»,- ասվում է տեղեկատվության մեջ։
Հիշեցնենք, որ գերիները, որոնց Բաքվում անվանել են «Հայաստանի կողմից ռազմական սադրանքներ իրականացնելու համար ուղարկված մի խումբ հայ զինծառայողների», պահվում են մոտ երեք տարի է: Միաժամանակ, «մոլորված» ադրբեջանցի զինվորներից մեկը մեղադրվում է սպանության մեջ։