Ռուսաստանի պաշտպանության նախարար Սերգեյ Շոյգուն հայտարարել է հայկական կողմի մասնակցության կարեւորությունն օպերատիվ եւ մարտական պատրաստվածության համատեղ միջոցառումներին՝ ՀԱՊԿ շրջանակում, տեղեկացրել է «ՌԻԱ Նովոստի»-ն։
«Հայաստանը մեր կազմակերպության անդամ է, մեր դաշնակիցը։ Մենք շահագրգռված ենք խաղաղության հաստատմամբ եւ անում ենք հնարավոր ամեն բան՝ Անդրկովկասում իրավիճակի կայունացման համար։ Ընդ որում՝ հատուկ կցանկանայի նշել հայկական կողմի մասնակցության կարեւորությունն օպերատիվ եւ մարտական պատրաստության միջոցառումներին՝ ՀԱՊԿ շրջանակում»,- ասել է Շոյգուն Մինսկում տեղի ունեցող ՀԱՊԿ մասնակից երկրների պաշտպանության նախարարների խորհրդի նիստում։