Հայաստանը 2022թ. Արցախին է տրամադրել 176 մլրդ դրամի վարկ։ Այս մասին Ազգային ժողովում խորհրդարանական մշտական հանձնաժողովների համատեղ նիստում, 2022թ. պետական բյուջեի կատարողականի հաշվետվության քննարկման ժամանակ, մայիսի 29-ին ասել է Հայաստանի ֆինանսների նախարար Վահե Հովհաննիսյանը։ Նրա խոսքով՝ Արցախին օգնության նման ծավալ մինչ այդ երբեք չի տրամադրվել։
Նա նաեւ անդրադարձել է պետական բյուջեի դեֆիցիտի հարցին։ «2022թ. բյուջեն իրականացվել է 179,5 մլրդ դրամ դեֆիցիտով՝ նախատեսված 22,9 մլրդ-ի դիմաց»,- տեղեկացրել է Հովհաննիսյանը։
Անդրադառնալով դեֆիցիտի ֆինանսավորմանը՝ նախարարը, մասնավորապես, նշել է, որ պետական փոխառությունների թողարկման պլանը կատարվել է լիովին՝ 252 մլրդ դրամի։
«Հայաստանը միջազգային կազմակերպություններից ստացել է 165 մլրդ դրամի վարկեր։ Մենք մարել ենք մոտ 100 մլրդ դրամ։ Արցախին տրամադրված վարկը կազմել է 176 մլրդ դրամ։ Դա ավելին է մինչ այդ նախատեսված ցուցանիշներից։ Արցախին օգնության նման ծավալ երբեք չի տրամադրվել։ Արդյունքում՝ պետական պարտքը 2022թ. դեկտեմբերի 31-ի դրությամբ կազմել է 4 տրլն 186 մլրդ դրամ կամ 10 մլրդ 637 մլն դոլար»,- ասել է ֆինանսների նախարարը։