Արմավիրի բաժնի համայնքային ոստիկանները ստացել են տեղեկություն, որ Արեւիկ գյուղի մի բնակիչ տնամերձ հողամասում աճեցնում է կանեփ: Մայիսի 31-ին նախաձեռնվել է քրեական վարույթ, որի շրջանակներում ոստիկանները զննություն են կատարել 44-ամյա տղամարդու տնամերձում:
Հողամասում հայտնաբերվել է 21 կանեփանման բույս: Տղամարդն ասել է, որ ինքն է աճեցրել կանեփը թմրամիջոց ստանալու եւ օգտագործելու համար:
Նմանատիպ մի ահազանգ էլ ոստիկանները ստացել էին Աշակերտ գյուղի մի բնակչի մասին: Զննության ընթացքում 39-ամյա տղամարդու տնամերձ հողամասում կանեփի 9 թուփ: Խորդանոցում էլ հայտնաբերվել է ավելի քան 300 գրամ մանրացված չորացված զանգված:
Արմավիրի ոստիկանները եւս մեկ նման տեղեկություն ստացել են Այգեշատ գյուղից: Ըստ այդմ, Այգեշատի բնակչի հողամասում ոստիկանները հայտնաբերել են 57 բույս: 62-ամյա տանտերը հայտնել է, որ ինքն է ցանել ու աճեցրել անձամբ օգտագործելու համար:
