«Ազատ Արցախ-Հայերի ձայն» նախաձեռնող խումբը մտադիր է ստորագրություններ հավաքել օրենսդրությունը փոխելու համար, որը խստագույն պատիժ է նախատեսում Լեռնային Ղարաբաղի ինքնորոշումը մերժելու և Հայոց ցեղասպանության նշանակությունը նսեմացնելու համար։ Նախաձեռնության անդամների կարծիքով՝ այս հանցագործությունները կատարելու համար պետք է նախատեսել մինչև 15 տարվա ազատազրկում։ Դա վերաբերում է պաշտոնյաներին՝ Հայաստանի ներկայացուցիչներին, քանի որ նրանց դիրքը կարող է անդառնալի վնաս հասցնել երկրին ու ժողովրդին։
Փաստաբան Արամ Օրբելյանը հունիսի 8-ին նախաձեռնության ասուլիսում հայտարարեց, որ երկուշաբթի նախաձեռնող խումբը պատրաստվում է դիմել Հայաստանի ԿԸՀ։ Վերջինս 10-օրյա ժամկետում պետք է քննարկի դիմումը և դրանից հետո սկսի ստորագրահավաքը, որը պետք է իրականացվի 60 օրվա ընթացքում։
«Ստորագրահավաքը կանցկացվի Երևանի համայնքային, գյուղական, մարզպետարանների և վարչական շրջանների շենքերում։ Ստորագրահավաքը պետք է տեղի ունենա վարչակազմի աշխատակցի և նախաձեռնող խմբի ներկայացուցչի ներկայությամբ։ Քաղաքացիները կարող են իրենց ստորագրությունը դնել վերը նշված հաստատություններից որևէ մեկում՝ անկախ գրանցման վայրից։ Այս նախաձեռնությանը կարող է միանալ Հայաստանի ցանկացած չափահաս քաղաքացի։ Այլ պահանջներ չկան։ Երկքաղաքացիությունը նույնպես խոչընդոտ չի լինի նախաձեռնությանը մասնակցելու համար։
Եթե հավաքվի 50000 ստորագրություն, ապա պաշտոնապես այս փաստաթուղթը կկոչվի օրինագիծ։ Անկախ Հայաստանի պատմության մեջ առաջին անգամ օրինագիծը կներկայացնեն քաղաքացիները՝ քաղաքացիական նախաձեռնությամբ։ Եթե խորհրդարանը չընդունի այս օրինագիծը, ապա հնարավոր կլինի դիմել ԿԸՀ եւ հավաքելով 300 հազար ստորագրություն՝ հարցը դնել հանրաքվեի»,- ասաց Օրբելյանը։
