Ավստրալացի սենատոր Նիկ Քսենոֆոնը իր գործընկերներին կոչ է արել ճանաչել հայերի, ասորիների եւ հույների ցեղասպանությունը:
Հոկտեմբերի 12-ին Ավստրալիայի Սենատում ելույթի ժամանակ նա հայտարարել է, որ «1915-1923 թթ. հայերը, հույներն ու ասորիները զոհ են դարձել ժամանակակից պատմության առաջին ցեղասպանություններից մեկին», հաղորդում է ավստրալահայերի armenia.com.au կայքը:
«Ճշգրիտ թվեր հայտնի չեն, սակայն, ըստ գնահատականների, ավելի քան 3,5 մլն մարդ է զոհ գնացել Օսմանյան կայսրության նպատակաուղղված, սիստեմատիկ գործողություններին»,-հայտարարել է սենատորը:
Նա նշել է Ավստրալիայի հայ ազգային կոմիտեի եւ Ավստրալիայի հույների խորհրդի` ցեղասպանությունների իրազեկման ուղղությամբ իրականացվող ջանքերը:
«Առաջիկա ամիսներին ես Հայ ազգայի կոմիտեի եւ հույների խորհրդի հետ աշխատելու եմ մի փաստաթղթի վրա, որը ներկայացվելու է Սենատ: Ես կոչ եմ անում իմ բոլոր գործընկերներին պաշտպանել այն»,-ասել է Քսենոֆոնը:
Սենատորը նաեւ նշել է, որ ավելի վաղ Ավստրալիան պաշտոնապես չէր ճանաչում ցեղասպանությունը Թուրքիայի հետ դիվանագիտական հարաբերությունների պատճառով:
«Սակայն եթե մենք պատմությունը չճանաչենք մեկ այլ երկրի վիրավորելու պատճառով, ապա որտե՞ղ է թույլատրելիի սահմանը: Ինչպիսի՞ իրադարձություն կամ խնդիր է մեզ համար բավականաչափ լուրջ` ռիսկ վերցնելու համար: Ժամանակն է, որ Ավստրալիան ընտրի իր դիրքորոշումը. կամ մենք ճանաչում ենք այդ ցեղասպանությունները կամ հրաժարվում ենք նրանցից»,-հայտարարել է նա:
