Հայաստանի տնտեսության ակտիվությունն ու լուրջ աճն ապահովում են առևտուրը և սպասարկման ոլորտը։ Այս մասին NEWS.am -ի թղթակցի հետ զրույցում ասել է տնտեսագետ, ՀՀ կառավարության նախկին փոխվարչապետ Վաչե Գաբրիելյանը։
Ըստ նրա, կարճաժամկետ հեռանկարում Արցախից հարկադիր տեղահանվածների ֆինանսական աջակցության խնդիր չի լինի, այդ գումարն առկա է, սակայն միջնաժամկետ և երկարաժամկետ հեռանկարում կարևոր է լուծել զբաղվածության և բնակարանային խնդիրները, այդ թվում՝ մարզերում։
«Շատ մարդ է եկել, և նրանք պետք է ինտեգրվեն տնտեսության մեջ, ուստի կա աշխատատեղերի, եկամտի և պետական աջակցության խնդիր»,- ընդգծել է նա։
Գաբրիելյանը հավելե է, որ մարդիկ եկել են առանց գույքի և ստիպված են լինելու ձեռք բերել այն, իսկ դա իր հերթին կհանգեցնի առևտրի ակտիվության աճին։
Միաժամանակ նա կարծում է, որ տնտեսության կայուն զարգացման տեսանկյունից խնդիրներ կան։
Նախկին փոխվարչապետը մտահոգություն է հայտնել արտադրության, այդ թվում՝ վերամշակող արդյունաբերության ոլորտում անկման առիթով։
«Ռուսաստանում հայկական արտադրանքը մրցունակության խնդրի առաջ է կանգնել. Դա պայմանավորված է նրանով, որ ռուբլու նկատմամբ հայկական արժույթի արժևորումն ավելի մեծ է, քան այլ երկրների արժույթների արժևորումը ռուբլու նկատմամբ, ինչը խնդիրներ է ստեղծում Հայաստանի արդյունաբերության ոլորտում։
Ինչ վերաբերում է վերաարտահանմանը, ապա այն շարունակում է աճել, սակայն աճի տեմպերի դանդաղում է նկատվում՝ կապված Վրաստանում մեքենաների ներմուծման սահմանափակումների, գների բարձրացման և Ռուսաստանում պահանջարկի նվազման հետ»,- եզրափակել է փորձագետը։
