Գերմանիայի կանցլերը և նախագահը կիրակի օրը առանձին ելույթներում խստորեն դատապարտել են Գերմանիայում հակասեմականության աճը Իսրայելի և ՀԱՄԱՍ-ի միջև պատերազմի բռնկումից հետո․ նրանք ընդգծել են նույն ուղերձը, որ անընդունելի է, որ նման ատելությունը ծաղկի մի երկրում, որը Հոլոքոստ է իրականացրել, հաղորդում է AP-ն։
Բեռլինում հազարավոր մարդիկ հավաքվել էին ցույցի, որը կոչված էր անհամաձայնություն արտահայտելու հակասեմականության դեմ և աջակցություն Իսրայելին: Մարդիկ կրում էին իսրայելական դրոշներ և պաստառներ, որոնց վրա պատկերված էին անհայտ կորած և ՀԱՄԱՍ-ի կողմից պատանդ պահվող մարդկանց լուսանկարները:
Բողոքի ակցիան, որը կազմակերպվել է տարբեր կազմակերպությունների լայն դաշինքի կողմից, տեղի է ունենում Գազայում պատերազմի բռնի սրումից հետո Գերմանիայում աճող հակասեմական միջադեպերի ֆոնին:
«Անտանելի է, որ այսօր հրեաները կրկին ապրում են վախի մեջ, հատկապես մեր երկրում, - ասել է նախագահ Ֆրանկ-Վալտեր Շտայնմայերը Բեռլինում Բրանդենբուրգի դարպասի առջև հավաքված ամբոխին:- Հրեաների, հրեական հաստատությունների վրա յուրաքանչյուր հարձակում Գերմանիայի համար խայտառակություն է։ Յուրաքանչյուր հարձակում ինձ լցնում է ամոթով և զայրույթով»:
Ավելի վաղ կանցլեր Օլաֆ Շոլցը հայտարարել էր, որ իրեն զայրացրել է հակասեմական աժիոտաժը, որը տարածվում է Գազայում պատերազմի ժամանակ, և նոր սինագոգի բացման արարողության ժամանակ զգուշացրել է, որ «այլևս երբեք» երդումը պետք է անխախտելի լինի:
Չորեքշաբթի օրը անհայտ անձինք Մոլոտովի երկու կոկտեյլ էին նետել Բեռլինի սինագոգի վրա, իսկ ոստիկանությունը ուժեղացրել է հրեական հաստատությունների անվտանգությունը։ Շոլցը, որը դատապարտել է բռնությունը, ելույթ է ունեցել տաճարի բացման արարողության ժամանակ Դեսաու քաղաքում՝ արևելյան Գերմանիայում, որի սինագոգը ավերվել էր նացիստների կողմից 85 տարի առաջ:
