Ադրբեջանը Ղարաբաղի տարածքում ապրող հայկական ծագում ունեցող քաղաքացիներին բարեկեցության համակողմանի երաշխիքներ է տրամադրում։ Ինչպես տեղեկացրել է APA-ն, այս մասին Ադրբեջանի պետական անվտանգության ծառայության պետ, գեներալ-գնդապետ Ալի Նագիեւն ասել է Եվրոպայի խորհրդի գլխավոր քարտուղար Մարիա Պեյչինովիչ-Բուրիչի հետ հանդիպման ժամանակ։
«Գեներալ-գնդապետ Ալի Նագիեւը ԵԽ գլխավոր քարտուղարի հետ հանդիպման ժամանակ ընդգծել է, որ Ադրբեջանը միշտ շահագրգռված է տարածաշրջանում կայուն խաղաղության վերականգնմամբ։ Նա նշել է, որ Ադրբեջանի կառավարությունը համակողմանի երաշխիքներ է տալիս հայկական ծագում ունեցող քաղաքացիների խաղաղության պայմաններում ապրելու համար, պատմել է այն աշխատանքի մասին, որն իրականացնում է պետությունը նրանց իրավունքների եւ ազատությունների պաշտպանության համար, այն պայմանների մասին, որոնք Ադրբեջանը ստեղծում է հանուն տարածաշրջանի բարեկեցության, հուսալի կայունության, ինչպես նաեւ Հայաստանի հետ հարաբերությունները կարգավորելու եւ շտապ խաղաղության պայմանագիր կնքելու մասին»,- ԶԼՄ-ն մեջբերել է Նագիեւի խոսքերը։
Հիշեցնենք, որ մոտ մեկ տարի առաջ Ադրբեջանը շրջափակման մեջ էր պահում Լեռնային Ղարաբաղի այդ նույն բնակչությանը, որին «երաշխավորում է բարեկեցություն», սովի էր մատնել, թույլ չէր տալիս դեղեր հասցնել, ահաբեկում էր, եւ արդյունքում՝ ցեղասպանածին գործողություններն ավարտեց ընթացիկ տարվա սեպտեմբերի 19-20-ի լայնածավալ ագրեսիայով։ Երկրամասի ողջ բնակչությունը լքեց հայրենի օջախները։ Լեռնային Ղարաբաղում մնացել են մի քանի տասնյակ հայեր՝ տարեց եւ հիվանդ մարդիկ, որոնք պարզապես չեն դիմանա երկար ճանապարհին։ Հավանաբար, Նագիեւը նրանց խոստացել է «լուսավոր ապագա», եթե, իհարկե, չենթադրենք, որ ադբեջանցի գեներալը վատ կարծիքի է Եվրոպայի խորհրդի գլխավոր քարտուղարի մտավոր կարողությունների մասին։
