Հենց մշակույթն է, որը կարող է մարդկությանն օգնել հաղթահարելու նորագույն ժամանակների մարտահրավերները, Սանկտ Պետերբուրգում Միացյալ մշակույթների ֆորումում ՌԴ մշակույթի նախարարության ղեկավար Օլգա Լյուբիմովայի հետ քննարկման ժամանակ ասել է Ռուսաստանում Հայաստանի դեսպան Վաղարշակ Հարությունյանը, հայտնում է ТАСС-ը։

Դեսպանը նշել է, որ ներկա դժվարին ժամանակաշրջանում երկրի և ժողովրդի մշակութային ինքնիշխանության պահպանումը յուրաքանչյուր պետության գլխավոր խնդիրն ու պարտականությունն է՝ նշելով, որ մարդկության կայուն զարգացման արժեքների խնդիրը ավելի հրատապ է դառնում։ 

«Այսօր բոլորիս համար՝ այս նշանակալից ֆորումի (Միացյալ մշակույթների ֆորում) մասնակիցների համար, ակնհայտ է, որ մշակույթն է, որ կարող է օգնել մարդկությանը հաղթահարել նոր ժամանակների մարտահրավերները՝ սահմանելով մեր արժեքների միավորումը որպես համաշխարհային վերափոխումների կայուն զարգացման բարձրագույն դրսեւորում»,- նշել է Հարությունյանը։

Մշակույթը, շարունակեց նա, անհատին, քաղաքացուն, հասարակությանն ու ազգին կերտող ինստիտուտն է։ «Մշակութային ինքնիշխանության պահպանումը ցանկացած ազգի պետականության հիմքն է։ Հայաստանը՝ որպես դարավոր մշակույթ ունեցող երկիր, գիտակցում է իր մշակութային ժառանգության և հոգևոր ինքնության պահպանման կարևորությունը»,- հավելել է դեսպանը։

Հարությունյանը վստահություն է հայտնել, որ Սանկտ Պետերբուրգի ֆորումը ոչ միայն կմիավորի բոլոր երկրներին՝ իրենց յուրահատուկ ժառանգությամբ և ինքնությամբ, այլ նաև «նախադեպ կստեղծի համաշխարհային հարթակի համար, որտեղ մշակույթների ինքնիշխանությունը միավորված է մեկ միասնական դաշտում»։