Դեկտեմբերի 4-ին Պետաիրավական հարցերի մշտական խորհրդարանական հանձնաժողովը կքննարկի Քրեական օրենսգրքում փոփոխություններ մտցնելու «Հայաքվե» օրենսդրական նախաձեռնությունը, որը նախատեսում է քրեականացնել Լեռնային Ղարաբաղի՝ Ադրբեջանի կազմում ճանաչելը և Հայոց ցեղասպանության նշանակությունը նսեմացնելը։ Այս մասին Ազգային ժողովում նոյեմբերի 24-ին «Հայաքվե» օրենսդրական նախաձեռնության վերաբերյալ խորհրդարանական լսումների ժամանակ հայտարարեց ընդդիմադիր «Հայաստան» խմբակցության քարտուղար Դաշնակցական Արծվիկ Մինասյանը։
Նրա խոսքով՝ նույն օրը կներկայացվի «Հայաքվե» նախաձեռնության վերաբերյալ Ազգային ժողովի հայտարարության նախագիծը, որը մշակվել է ընդդիմադիր դաշինքի «Հայաստան» խորհրդարանական խմբակցության կողմից և համաձայնեցվել է «Պատիվ ունեմ» խորհրդարանական խմբակցության հետ։
«Եվ եթե հանձնաժողովը դրական եզրակացություն չտա, ընդդիմությունը կփորձի այդ նախագծերն ընդգրկել խորհրդարանի օրակարգ հենց հաջորդ օրը՝ լիագումար նիստում քվեարկության միջոցով»,- հավելեց Մինասյանը։
