2023թ. 9 ամիսների արդյունքներով Հայաստանի պետական պարտքը կազմել է 4 տրլն 454 մլրդ դրամ։ Այս մասին Ազգային ժողովում, ֆինանսավարկային եւ բյուջետային հարցերի խորհրդարանական մշտական հանձնաժողովի նիստում, 2023թ. ինն ամիսների պետական բյուջեի կատարողականի մասին հաշվետվության քննարկման ժամանակ, նոյեմբերի 27-ին ասել է ֆինանսների փոխնախարար Վահան Սիրունյանը։

Նրա խոսքով՝ երկրի պետական պարտքը արժույթով եւ դոլարով 9 ամսում ավելացել է 6,4 տոկոսով։ «Այն ավելացել է համամասնորեն, քանի որ փոխարժեքը, ըստ էության, այնքան էլ չի տատանվել նախորդ տարեվերջի համեմատ։ Կենտրոնական բանկի պարտքը նվազել է, իսկ պետական պարտքն ավելացել մոտ 7 տոկոսով։ Պետական պարտքը կազմել է 4 տրլն 454 մլրդ դրամ։ Նախորդ տարվա վերջի 4 տրլն 186,7 մլրդ դրամի համեմատ կառավարության պարտքը կազմել է 4 տրլն 244 մլրդ դրամ։ Արտաքին պարտքը կազմել է 2 տրլն 354 մլրդ դրամ, ներքինը՝ 1 տրլն 890 մլրդ դրամ»,- նշել է Սիրունյանը։

Դոլարով արտահայտված՝ պետական պարտքը 2023թ. 9 ամսում կազմել է 11 մլրդ 322 մլն դոլար։ Կառավարության պարտքը կազմել է 10 մլրդ 790 մլն դոլար, իսկ ԿԲ պարտքը՝ 531 մլն դոլար։

Ըստ փոխնախարարի՝ պետական պարտքի գծով բոլոր կողմնորոշիչները ընդհանուր առմամբ պահպանվել են։  Միջին տոկոսադրույքը անցած տարեվերջի համեմատ ավելացել է 0,7 տոկոսային կետով։ Ընդհանուր առմամբ,  պետական պարտքի կառավարման տեսակետից Հայաստանը գտնվում է սահմանված նորմատիվների սահմաններում։