Մերձավորարեւելյան հակամարտության կարգավորումը հնարավոր կլինի բոլորի կողմից Իսրայելի ինքնապաշտպանության իրավունքի եւ պաղեստինցիների ապագայի ապահովման պայմանով։ Այս մասին հայտարարել է Գերմանիայի արտաքին գործերի նախարար Աննալենա Բերբոքը՝ ելույթ ունենալով «Արտաքին քաղաքականության բեռլինյան համաժողով» կոնֆերանսում։
«Իսրայելը երբեք անվտանգության մեջ չի ապրի, եթե ՀԱՄԱՍ [պաղեստինյան շարժման] ահաբեկչությունը չհաղթահարվի,- ասել է նա։- Դրա հետ միաժամանակ, Իսրայելի անվտանգությունը կարող է [ապահովվել] միայն այն դեպքում, եթե պաղեստինցիներն ունենան ապագայի հեռանկարներ»։
Գերմանիայի արտաքին գործերի նախարարը հերթական անգամ ընդգծել է Իսրայելի ինքնապաշտպանության իրավունքը։ «Դրա հետ միաժամանակ, մենք մշտապես Իսրայելին հասկացնում ենք, որ պետք է հետեւողականորեն խուսափել զոհերից քաղաքացիական բնակչության շրջանում»,- ավելացրել է նա։
Բերբոքը նշել է, որ հաճախ այս թեմայով բանավեճերի ժամանակ առաջին պլան են դուրս գալիս ոչ թե մարդիկ, այլ մոտեցումները՝ «կամ Իսրայելի ինքնապաշտպանության իրավունք, կամ հումանիտար աղետ Գազայում»։
«Սակայն իրականություն են թե՛ մեկը, թե՛ մյուսը։ Միայն այն դեպքում, եթե հոգանք թե՛ մեկի, թե՛ մյուսի մասին, կարող է խաղաղություն լինել»,- ասել է արտաքին գործերի նախարարը։ Նա «անհավանական բարդ դիլեմա» է անվանել հնարավոր բանակցությունները Մերձավոր Արեւելքում ապագա խաղաղության մասին։
