Իրանը չի մասնակցել Մերձավոր Արեւելքում ԱՄՆ զինված ուժերի ստորաբաժանումների դիրքերի դեմ գոհներին։ Այսպիսի գրավոր հայտարարություն է ուղարկել ՄԱԿ Անվտանգության խորհուրդ ՄԱԿ-ում իսլամական հանրապետության մշտական ներկայացուցիչ Ամիր Սայիդ Իրավանին։

«Կցանկանայի մեկ անգամ եւս ընդգծել. Իրանը չի մասնակցել որեւէ հարձակման ԱՄՆ ԶՈւ ստորաբաժանումների վրա։ Իսլամական հանրապետությունը ԱՄՆ մեղադրանքները համարում է անհիմն եւ կարծում է, որ այդ բոլոր հայտարարությունները օկուպանտ երկրի փորձն են՝ արդարացնելու սեփական ագրեսիան եւ միջազգային իրավունքի ու ՄԱԿ Կանոնադրության լուրջ խախտումները, որոնք նա կատարում է Սիրիայում եւ մերձավորարեւելյան ողջ տարածաշրջանում»,- նրա խոսքերը մեջբերել է Tasnim գործակալությունը։

Ավելի վաղ The Washington Post թերթը, հղում կատարելով Պենտագոնի տվյալներին, տեղեկացրել էր, որ ամերիկյան զինվորականները Մերձավոր Արեւելքում հոկտեմբերից ենթարկվել են զինյալների առնվազն 76 գրոհի։ Պարբերականը նշել է, որ հրթիռակոծությունները եւ անօդաչուների հարձակումները ԱՄՆ զորքերի դեմ կատարվում են գրեթե ամեն օր։

ԱՄՆ ԶՈւ Կենտրոնական հրամանատարության տեղեկություններով՝ Կարմիր ծովում երեք առեւտրանավերի դեմ գրոհները կատարել են Իրանի կողմից աջակցվող «Անսար Ալլահ» շարժման հուսիները։ ԱՄՆ ՌԾՈւ «Քարնի» հրթիռային ականակիրը հետ է մղել հարձակումը՝ խոցելով առնվազն երեք անօդաչու։