ՆԱՏՕ-ի անդամ՝ հատկապես եվրոպական երկրների մոտ աճում է մտավախությունը, որ ԱՄՆ-ը կարող է դուրս գալ դաշինքից, եթե Թրամփը վերընտրվի նախագահի պաշտոնում, սակայն ՆԱՏՕ-ում ԱՄՆ դեսպան Ջուլիանա Սմիթը «Euronews»-ին տված հարցազրույցում ասել է, որ «վաղաժամ» է նման եզրակացություններ անելը։
Եվրոպացի դաշնակիցները, դեսպանի խոսքով, կարող են վստահ լինել, որ ԱՄՆ-ի աջակցությունը ՆԱՏՕ-ին հաստատուն է։
«Միշտ տարբերություն կա նրանում թե ինչ են ասում թեկնածուները նախընտրական արշավի ժամանակ, և ինչ է իրականում տեղի ունենում, երբ նրանք ստանձնում են պաշտոնը»,- ընդգծել է ամերիկացի դիվանագետը:
Նա ասել է, որ դաշնակիցները պետք է ուշադրություն դարձնեն «ոչ թե մեկ անձի կամ մեկ թեկնածուի», այլ հարցումների տվյալներին, որոնք ցույց են տալիս, որ ամերիկացիների ճնշող մեծամասնությունը վճռականորեն աջակցում է դաշինքին:
«Միակ հարցը, որում հանրապետականներն ու դեմոկրատները համակարծիք են, վերաբերում է ՆԱՏՕ-ին»,- շեշտել է Սմիթը։
