2022 թվականի Պրահայում կայացած հանդիպման ժամանակ Ալիեւի հետ դուք վերահաստատեցիք ձեր հանձնառությունը Ալմաթիի հռչակագրին եւ անհրաժեշտ է, որ Ադրբեջանը փարատի երկիմաստությունը ինչ վերաբերում է ՀՀ տարածքային ամբողջականությանը: Այս մասին ասել է Ֆրանսիայի նախագահ Էմանուել Մակրոնը՝ ՀՀ վարչապետ Նիկոլ Փաշինյանի հետ համատեղ ասուլիսին:
«Ինչ վերաբերում է քարտեզներին, որպեսզի բարեխիղճ աշխատանք կատարվի սահմանների սահմանազատման եւ սահմանագծման համար, ինչը հիմք կծառայի սահմանին երկուստեք ուժերի հետ քաշման համար: Մենք նաեւ կոչ ենք անում ի կատար ածել արդարադատության միջազգային դատարանի 2023 թվականի նոյեմբերի 17-ի որոշումը, համաձայն այս որոշման, Ադրբեջանը պետք է ապահովի, որպեսզի այն մարդիկ, որոնք լքել են Լեռնային Ղարաբաղը 2023 թվականի սեպտեմբերի 19-ից եւ ովքեր ցանկանում են վերադառնալ, կարողանան դա անել, անարգել եւ արագորեն:
Մենք ցանկանում ենք, որ Հարավային Կովկասը լինի խաղաղության, ինտեգրման եւ համագործակցության տարածաշրջան եւ անհրաժեշտ է, որ հաղորակցման միջոցները նույնպես լինեն ինտեգրման գործոններ եւ ոչ թե պառակտման: Ես այցելել եմ Կենտրոնական Ասիա եւ ցանկանում եմ, որ Կենտրոնական Ասիայի Հարավային Կովկասի եւ ԵՄ-ի միջեւ հաղորդակցութան կապերը զարգանան, ողջունում եմ այս ընդհանուր հավակնության մեջ ձեր խաղաղութան խաչմերուկներ նախաձեռնության ներդրումը:
Մենք այնուհետեւ կքննարկենք նաեւ երկկողմ համագործակցության ամրապնդմանն ուղղված հարցերը, մենք կշարունակենք աջակցել ենթակառուցվածների զարգացմանը Հայաստանում, մեր ձեռնարկությունների մասնակցությամբ, կշարունակենք նաեւ համագործակցությունը պաշտպանության ոլորտում: Ֆրանսիան տվել է իր համաձայնությունը պաշտպանական զինտեխնիկայի առաքման համար եւ Ֆրանսիան կշարունակի այդ ոլորտում պատասխանատվության ոգով՝ չցանկանալով որեւիցե էսկալացիա»,-ասաց Մակրոնը:
Մակրոնը նշեց, որ Ֆրանսիան նաև շարունակում է իր մարդասիրական հանձնառությունն՝ ի նպաստ Լեռնային Ղարաբաղի փախստականների՝ 2023 թվականին տրամադրելով 29 մլն եվրոյի օգնություն:
«Ֆրանսիան կշարունակի վճռականորեն աջակցել Եվրամիության և Հայաստանի միջև հարաբերությունների զարգացմանը: Այստեղ նույնպես արձանագրում ենք առաջընթաց՝ ի նպաստ ինքնիշխանության և մեր ընդհանուր ռազմավարական շահերի: Եվրամիության դիտորդական առաքելությունն այսուհետ ամրապնդված է: Այն նպատակ ունի նպաստել կայունությանը, միջազգային հանրության անաչառ տեղեկատվությանը և ռազմական շփման գոտիներում խոցելի բնակչության ապահովությանը: Հայաստանը նույնպես պետք է օգտվի խաղաղության եվրոպական գործիքներից: Եվրամիությունը և Հայաստանը ցանկանում են նոր գործընկերության ժամանակացույց»,-ասաց նա:
