Եվրոպական երկրները ցանկանում են հավաքել 1․5 միլիարդ դոլար Ուկրաինային արտակարգ ֆինանսավորում հատկացնելու համար, որպեսզի Ուկրաինայի զինված ուժերի զինամթերքի դեֆիցիտի պայմաններում երրորդ երկրներից հրետանային արկեր ձեռք բերվեն։ Այս մասին հայտնում է «Financial Times» թերթը՝ հղում անելով իր աղբյուրներին։
Հաղորդվում է, որ այս ծրագիրը առաջ է տանում Չեխիան, որն այս կերպ փորձում է Ուկրաինային փոխհատուցել զինամթերքի մատակարարման ձգձգումներն ԱՄՆ Կոնգրեսում Կիևին հետագա օգնության վերաբերյալ վեճերի և եվրոպական գործարաններում պարկուճների արտադրության դանդաղ տեմպերի պատճառով։
«CBC» հեռուստաալիքը հայտնել է, որ Չեխիայի նախաձեռնությանը միացել են Դանիան և Նիդեռլանդները։ Օտտավան պատրաստ է 30 միլիոն դոլար ծախսել արկերի գնման համար: Կանադայի պաշտպանության նախարար Բիլ Բլերը հեռուստաալիքի հետ զրույցում հաստատել է, որ այդ հարցով բանակցություններ են ընթանում չեխական կողմի հետ։
Միևնույն ժամանակ, Չեխիան չի մեկնաբանում թերթի տեղեկությունը։ Պաշտոնատար անձինք, ըստ չեխական լրատվամիջոցների, վկայակոչում են այլ պետությունների հետ ձեռք բերված պայմանավորվածություններն ու տեղեկատվության գաղտնիությունը։
Մինչդեռ «seznam.cz» լրատվական պորտալը հայտնել է, որ Չեխիայի նախաձեռնության իրագործման հարցը կքննարկվի առաջիկա երկուշաբթի Ուկրաինային աջակցություն տրամադրելու հարցով կայանալիք գագաթնաժողովում, որը տեղի կունենա Փարիզում Ֆրանսիայի նախագահ Էմանուել Մակրոնի հրավերով։ Չեխիան այնտեղ կներկայացնի վարչապետ Պետր Ֆիալան։