2023թ. Հայաստանում կառուցվել, ինչպես նաեւ հիմնովին կամ մասնակի նորոգվել է 803 կիլոմետր ճանապարհ, որոնցից 556-ը՝ պետական բյուջեի միջոցներով։ Այս մասին Ազգային ժողովում, տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության խորհրդարանական մշտական հանձնաժողովի նիստում, կառավարության ծրագրի (2021-2026թթ.) 2023թ. կատարողականի մասին հաշվետվության քննարկման ժամանակ, մարտի 27-ին ասել է տարածքային կառավարման եւ ենթակառուցվածքների նախարար Գնել Սանոսյանը։
Նրա խոսքով՝ լիովին ավարտվել են 501 կիլոմետր ճանապարհների կառուցման աշխատանքները։ «Դեռ աշխատանք կա կատարելու 55 կիլոմետր ճանապարհների վրա։ Առայժմ անցկացվել են առաջին եւ երկրորդ շերտերը։ Դեռ պետք է անցկացնենք վերջին շերտը»,- ավելացրել է նախարարը։
Իրականացվել են նաեւ ասֆալտապատման աշխատանքներ սուբսիդավորման ծրագրերի շրջանակում։ «Փռվել է 210 կիլոմետր ասֆալտածածկ»,- նշել է կառավարության ներկայացուցիչը։