Ինձ վրա ճնշում չեմ զգացել, փաստացի ինձ վրա չկա ճնշում: Այս մասին, այսօր՝ մարտի 29-ին, Դատավորների ընդհանուր ժողովի մեկնարկին լրագրողների հետ զրույցում նշեց ԲԴԽ անդամ Էդգար Հովհաննիսյանը:
Անդրադառնալով նրան, որ այսուհետ դատավորները պետք է մշտադիտարկման ենթարկվեն, նա ասաց. «Այստեղ ԲԴԽ-ին զեկուցելու մասին չէ խոսքը, պարզապես ներկայացնում է աշխատակազմի ղեկավարը դատավորների վարույթներում գնտվող գործերի ժամկետների, դրանց քննության մասին: ԲԴԽ-ն դրա հետ ընդհանրապես կապ չունի»:
Հարցին՝ ի՞նչ կփոխվեր ԲԴԽ-ի աշխատանքում, եթե այդ կառույցի անդամ դառնար Վազգեն Ռշտունին, Էդգար Հովհաննիսյանը պատասխանեց. «Չեմ ուզում ենթադրություններով կամ կանխատեսումներով զբաղվել, չեմ կարող ասել: Ես որեւէ խնդիր չունեմ պարոն Ռշտունու հետ եւ եթե օրենքով սահմանված կարգով ընտրվեր, գար, սիրով կաշխատեի»:
Դիտարկմանը, որ ԲԴԽ-ում որոշումներն ընդունվում են կոնսենսուսով, եւ Ռշտուհու ԲԴԽ-ում հայտնվելը կարող էր խաթարել այդ պրակտիկան, նա ասաց. «Եթե դուք ԲԴԽ-ի գործունեությունն ուսումնասիրեք, կտեսնեք, որ այդքան էլ այդպես չէ: Եղել են մի քանի որոշումներ, որոնց ես դեմ եմ քվեարկել»:
Ինչ վերաբերում է նրան, որ չաթի պատճառով 4 դատավոր հրաժարական է տվել, իսկ Վազգեն Ռշտունին էլ երեկ հայտարարել է, որ նժարին այլ հարց է դրված, դրա համար է հրաժարվում ԲԴԽ անդամի թեկնածությունից, արդյոքք դա մտահոգիչ չէ, Էդգար Հովհաննիսյանն ասաց. «Մտահոգիչ է, եթե նման բաներ կան, ինձ թվում է, պետք է ավելի կոնկրետ բարձրաձայնվի եւ քննարկման առարկա դառնա: Եէթե չի բացահայտվում ենթատեքստը, ես ինչպե՞ս կարող եմ ուղիղ պատասխան տալ: Պետք է այդ միտքը հմապատասխան անձից գա, որ ըստ դրա ԲԴԽ-ն կարողանա որեւէ գործողություն իրականացնել: Եթե ԲԴԽ-ին չի ասվում, որ կոնկրետ այսինչ պատճառով ես չեմ ցանկանում ԲԴԽ անդամի իմ թեկնածությունը շարունակել ու դառնալ ԲԴԽ անդամ, մենք այլ բան չունենք անելու:
Մենք որեւէ հարց քննարկում ենք համապատասխան դիմումի, հաղորդման կամ լրատվամիջոցների տեղեկատվության հիման վրա»:
Նա նկատեց, որ որպեսզի դատավորը ԲԴԽ անդամի թեկնածու դառնա, նա պետք է բարեվարքություն անցնի, Վազգեն Ռշտունին դա անցել էր, իսկ հիմա դեռեւս այդպիսի այլ թեկնածու չկա:
