Ռուսաստանի Քննչական կոմիտեի Բրյանսկի շրջանի վարչությունը քրեական գործ է հարուցել հանցախմբի կողմից անօրինական ներգաղթի կազմակերպման փաստով (ՌԴ Քրեական օրենսգրքի 210-րդ հոդվածի 1-ին, 2-րդ մասեր և 322.1 հոդվածի 2-րդ մաս. մինչև 20 տարվա ազատազրկում) Սմոլենսկի և Բրյանսկի շրջանների տասը բնակիչների նկատմամբ: Դրա մասին հայտնել է «Կոմերսանտը»։
Գործով ամբաստանյալները Տաջիկստանի և Ուզբեկստանի հանրապետությունների քաղաքացիների համար կազմակերպել են Ռուսաստանի կեղծ քաղաքացիության ստացում։
Քննիչները Ռուսաստանի ազգային գվարդիայի աջակցությամբ ձերբակալել են ութ կասկածյալի։ Կազմակերպիչը, որը նույնպես Տաջիկստանի Հանրապետության քաղաքացի է և հանցախմբի մեկ այլ անդամ հետախուզվում են: Գործով բոլոր կասկածյալների նկատմամբ առաջիկայում խափանման միջոց կընտրվի։
Քննչական կոմիտեի տվյալներով՝ հանցախումբը, որի կազմում ընդգրկված է եղել քաղաքացիական կացության ակտերի գրանցման մարզային վարչություններից մեկի ղեկավարը, ստեղծել է Տվերի մարզի 30-ամյա մի բնակիչ։
Ըստ քննիչների՝ 2022 թվականին դրամական պարգևի դիմաց կասկածյալները ձևակերպել են Տաջիկստանի և Ուզբեկստանի հանրապետությունների քաղաքացիների հայրության ճանաչումը Բրյանսկի մարզում բնակվող յոթ անչափահասների նկատմամբ։ Այս ընթացակարգն արվել է, որ տղամարդիկ հետագայում ՌԴ քաղաքացիություն ստանան պարզեցված եղանակով: Վարձատրությունը, ըստ Քննչական կոմիտեի, կազմել է «տասնյակ հազարավոր ռուբլի»։
Հանցագործությունը բացահայտել են ՌԴ ՆԳՆ քրեական հետախուզության գլխավոր վարչության աշխատակիցները՝ Ռուսաստանի ՆԳՆ Բրյանսկի շրջանի կազմակերպված հանցավորության դեմ պայքարի բաժնի օպերատիվ աշխատակիցների և տեղական ԱԴԾ վարչության աշխատակիցների հետ։ Այժմ քննիչները օպերատիվ-որոնողական աշխատանքներ են իրականացնում՝ բացահայտելու այլ դրվագներ և հանցավոր գործունեության այլ մասնակիցների։
