Մեքսիկան հայց է ներկայացրել միջազգային դատարան՝ Կիտոյում երկրի դեսպանատան վրա գրոհից հետո՝ ընդդեմ Էկվադորի իշխանությունների գործողությունների։ Ըստ РИА Новости-ի՝ դրա մասին հայտարարել է Մեքսիկայի ԱԳՆ իրավախորհրդատու Ալեխանդրո Սելորիոն:
«Հայցը, որն արդեն ներկայացվել է Արդարադատության միջազգային դատարան, առաջին փուլն է, որտեղ բերված են առաջնային փաստարկներ»,- ասել է Սելորիոն: Դիվանագետն ընդգծել է, որ Մեքսիկան մտադիր է մոտ ապագայում շատ ավելի ծավալուն հայտարարություն ներկայացնել։
Մեքսիկայի իշխանությունների այս քայլը հաջորդել է միջադեպին, երբ ապրիլի սկզբին Էկվադորի ոստիկանությունը ներխուժել էր Կիտոյում Մեքսիկայի դեսպանատուն և ձերբակալել Էկվադորի նախկին փոխնախագահին: Վերջինս փախստականի կարգավիճակ ուներ և քաղաքական հետապնդումների պատճառով քաղաքական ապաստան էր խնդրել Մեքսիկայից:
Մեքսիկայի նախագահ Անդրես Մանուել Լոպես Օբրադորը կատարվածն անվանել էր միջազգային իրավունքի և իր երկրի ինքնիշխանության կոպտագույն խախտում։ Պետության ղեկավարը Մեքսիկայի արտգործնախարար Ալիսիա Բարսենային հանձնարարել էր դադարեցնել դիվանագիտական հարաբերությունները Էկվադորի հետ։
