Թուրքիայի նախագահ Ռեջեփ Թայիփ Էրդողանը նամակ է գրել Հռոմի պապ Ֆրանցիսկոս Երկրորդին, որում նշել է, որ «մարդկությունը չպետք է թույլ տա Գազայի հատվածում միջազգային իրավունքի խախտումներ», հայտնում է Anadolu-ն։
«Մարդկությունը պետք է բողոքի հիվանդանոցների, դպրոցների, մզկիթների և եկեղեցիների ռմբակոծությունների դեմ, որոնց չի կարելի դիպչել նույնիսկ պատերազմի ժամանակ: Անհնար է Մերձավոր Արևելքում մշտական խաղաղություն և կայունություն հաստատել առանց պաղեստինա-իսրայելական հիմնախնդրի արդարացի կարգավորման։ Կարևոր է, որ անկախ, ինքնիշխան և աշխարհագրորեն ինտեգրված Պաղեստին պետությունը հայտնվի 1967 թվականի սահմաններում՝ մայրաքաղաք Արևելյան Երուսաղեմով և իր տեղը գրավի համաշխարհային համակարգում՝ որպես միջազգային հանրության իրավահավասար անդամ»,- ասված է նամակում։
Էրդողանը նշել է, որ Գազայի հատվածի առջև ծառացած մարտահրավերները, իսրայելական հարձակումները, որոնք շարունակվել են էքսկլավում նույնիսկ մահմեդական սուրբ Ռամադան ամսվա ընթացքում, ինչպես նաև Ուկրաինայում զինված հակամարտության գլոբալ հետևանքները, որն արդեն երրորդ տարին է, միջազգային հանրությունից պահանջում են գործել համագործակցության և համակարգման մեջ:
«Աշխարհում տարածվող միտումներով, որոնք վերջերս սպառնում են միջհասարակական խաղաղությանը և կայունությանը, ինչպիսիք են իսլամաֆոբիան, ռասիզմը և այլատյացությունը, աշխարհն ավելի քան երբևէ պատմության մեջ կարիք ունի ներառական և ռացիոնալ քաղաքականության, ինչպես նաև խաղացողների, ովքեր կարող են երկխոսություն հաստատել բոլոր կողմերի հետ՝ ցանկացած պայմաններում: Այս փոխըմբռնման շրջանակներում մենք վճռական ենք շարունակել զարգացնել երկխոսությունը և համագործակցությունը Վատիկանի հետ՝ խթանելու խաղաղ համակեցության և փոխըմբռնման մշակույթը՝ հիմնված համամարդկային արժեքների և համաշխարհային խաղաղությանը ծառայելու մեր նպատակի վրա», - ասված է Թուրքիայի նախագահի նամակում։
